ILHAAMI AAYAAT and Misc. Ghazals 5:32 pm
Aise hijr ke mausam ab kab aate haiN
Tere alaava yaad humeN sab aate haiN
Jazb kare kyon ret hamaare ashko ko
Tera daaman tar karne ab aate haiN
Ab wo safar ki taab nahi baaqi varna
Humko bulaavey dasht se jab tab aate haiN
Jaagti aankhoN se bhi dekho duniya ko
Khaab ka kya hai, wo har shab aate haiN
KaaGhaz ki kashti mei dariya paar kiya
Dekho humko kya-kya kartab aate hain
~ Shahryar ~
ILHAAMI AAYAAT and Misc. Ghazals 5:39 pm
Sach yeh hai, bekaar humeN gham hota hai
Jo chaha tha, duniyaa meN kam hota hai
Dhalta suraj, phaila jungle, rasta gum
Humse puchho kaisa aalam hota hai
GhairoN ko kab fursat hai dukh dene ki
Jab hota hai, koi humdum hota hai
Zakhm to humne in ankhon se dekhe haiN
LogoN se sunte hain, marham hota hai
Zahn kii shaakhoN par ash’aar aa jaate haiN
Jab teri yaadoN ka mausam hota hai
{ Javed Akhtar }
Ahmad Faraz and ILHAAMI AAYAAT 4:05 pm
Dil munaafiq tha shab-e-hijr maiN soyaa kaisaa
Aur jab tujh se milaa toot ke royaa kaisaa
Zindagi meN bhi ghazal hi ka Qareenaa raK_khaa
Khaaab dar khaab tere gham ko piroyaa kaisaa
Ab to chehroN pe bhi katboN ka ghumaaN hota hai
AankhaiN patth_raayi hui haiN lab-e-goyaa kaisaa
Dekh ab qurb ka mausam bhi na sar sabz lage
Hijr hi hijr maraasim maiN samoyaa kaisaa
Aik aansoo tha ke dariya-e-nidaamat tha FARAZ
Dil se baibaak shanawar ko duboyaa kaisaa
ILHAAMI AAYAAT and Iftekhar Arif 4:57 pm
Dayar-e-noor meN teeraaH shaboN ka saathi ho
Koi to ho jo meri wahshatoN ka saathi ho
MaiN usse jhuTT bhi boluN to mujh se sach bole
Mere mizaaj k sab mousamoN ka saathi ho
Wo mere naam ki nisbat se mo’tabar thahre
Gali gali meri ruswaaiyon kaa saathi ho
MaiN us k hath na aauN wo mera ho k rahe
MaiN gir parun to meri pastiyoN ka saathi ho
Wo khaab dekhe to dekhe mere hawale se
Mere khayaloN k sab manzaroN ka saathi ho
ILHAAMI AAYAAT and Misc. Ghazals 6:58 pm
Tumhare shahr ka mausam baRa suhaanaa lage
MaiN ek shaam chura luN agar buraa naa lage
Tumhare bas meN agar ho to bhool jaao humeN
TumheN bhulaane meN shayad mujhe zamanaa lage
Hamaare pyar se jalne lagi hai ek duniya
Dua karo kisi dushman ki bad-dua naa lage
Na jaane kya hai kisi ki udaas aankhoN meN
Vo muNh chhupa k bhi jaye to bewafa naa lage
Jo doobnaa hai to itne sukoon se dubo
K aas-paas ki leharoN ko bhi pata naa lage
Ho jis adaa se mere saath bewafaayi kar
K tere baad mujhe koi bewafaa naa lage
Vo phool jo mere daaman se ho gaye mansoob
Khudaa kare unhe bazaar ki hawa naa lage
Tum aankh moond ke pi jao zindagi ‘Qaiser’
K ek ghoont meN shayad ye bad-mazaa naa lage
[ Qaisar ul J'afri ]
Ghalib Ayaz and ILHAAMI AAYAAT 6:06 pm
Kabhi visaal kabhi intezaar karte hue
Kati hayaat yahi kar o baar karte hue
Wo apne zulm k fan me kamal e fan ki taraf
Hum unse rishtaa e dil ustawaar karte hue
Bachi jo umr to phir tere shahr aayenge
Hum apne khoye hue pal shumar karte hue
Guzar na jaye ye tajdeed e ahd ka mausam
Masaalehat ki feza saazgaar karte hue
ZameeN ko zard libaadaa pasand aata hua
Falak darakhtoN ko be barg o bar karte hue
Ahmad Faraz and ILHAAMI AAYAAT 6:03 pm
Kuchh na kisii se boleNge
Tanhaayii meN ro leNge
Ham berahabaroN kaa kyaa
Saath kisii ke ho leNge
Khud to hue rusavaa lekin
Tere bhed na kholeNge
Jivan zahar bharaa saagar
Kab tak amrit gholeNge
NiiNd to kya aayegi ‘Faraz’
Maut aayii to so leNge
***~***
Faiz Ahmad Faiz and ILHAAMI AAYAAT 4:58 pm
Tumhaari yaad ke jab zakhm bharne lagte haiN
Kisi bahaane tumheN yaad karne lagte haiN
Hadees-e-yaar ke unvaa nikharne lagte haiN
To har hareem meN gesu saNwarne lagte haiN
Har ajnabi hameN mehram dikhayi deta hai
Jo ab bhi teri gali se guzarne lagte haiN
Sabaa se karte haiN gurbat-naseeb zikr-e-watan
To chashm-e-subah meN ansoo ubharne lagte haiN
Vo jab bhi karte hain is nutq-o-lab ki bakhiyaagari
Fazaa mei aur bhi naghme bikharne lagte haiN
Dar-e-qafas pe andhere ki muhar lagti hai
To ‘Faiz’ dil meN sitaare utarne lagte haiN
Azm Bahzad and ILHAAMI AAYAAT 4:50 pm
Vus’At-e-chashm ko andoh-e-basaarat lik’kha
MaiN ne ik vasl ko ik hijr ki Haalat lik’kha
MaiN ne lik’kha k Saf-e-dil kabhi KHaali nah huii
Aur KHaali jo huii bhi to malaamat lik’khha
Sirf aavaaz kahaaN tak mujhe jaari rakhti
MaiN ne chup saadh li, san’naTe ko Aadat lik’kha
Yeh safar paaoN hilaane ka nahiiN aaNkh ka hai
MaiN ne is baab meN rukne ko masaafat lik’kha
MaiN ne dastak ko likha kash-ma-kash-e-be-KHabari
Jumbish-e-pardaa ko aane ki ijaazat lik’kha
Likhne vaaloN ne to hone ka sabab lik’kha hai
MaiN ne hone ko nah hone ki vazaaHat lik’kha
Ashk agar sab ne likhe, maiN ne sitaare lik’khe
Aajizii sab ne likhi, maiN ne ibaadat lik’kha
ZaKHm likhne ke liye maiN ne likhi he Ghaflat
Khuun likhna tha magar maiN ne Haraarat lik’kha
Koii aasan rafaaqat nahiiN lik’khi maiN ne
Qurb ko jab bhi likha juzv-e-raqaabat lik’kha
MaiN ne KHushbu ko likha dast-ras-e-gum-shudagi
Rang ko faaslaa rakhne ki riAayet lik’kha
Husn-e-goyaaii ko likhna tha, likhi sargoshi
Shor likhna tha so aazar-e-sama’At lik’kha
MaiN ne parvaaz likhi hadd-e-falak se aage
Aur be-baal-o-pari ko bhi nehayet lik’kha
MaiN ne tA’biir ko teHriir meN aane nah diya
Khaab likhte huye moHtaaj-e-bashaarat lik’kha
Mere sar par kabhi afsos ka saayaa nah rahaa
Ranj tha jis ki jagah maiN ne shikaayat lik’kha
Itne dA’voN se guzar kar yeh KHayaal aataa hai
‘AZM’ kya tum ne kabhi Harf-e-nidaamat lik’kha
Ahmad Faraz and ILHAAMI AAYAAT 6:51 pm
Havaa ke zor se pindaar-e-baam-o-daar bhii gayaa
ChiraaGh ko jo bachaate the un kaa ghar bhii gayaa
Pukaarte rahe mahfuuz kashtiyoN vaale
MaiN dubtaa hua dariya ke paar utar bhii gayaa
Ab ehatiyaat kii deevaar kyaa uThaate ho???
Jo chor dil meN chhupa tha vo kaam kar bhii gayaa
MaiN chup rahaa k isi meN thii aafiyat jaaN kii
koyii to merii tarah thaa jo daar par bhii gayaa
Sulagte sochate viiraan mausamoN kii tarah
KaRaa thaa ahad-e-javaanii magar guzar bhii gayaa
Jise bhulaa na sakaa us ko yaad kyaa rakhtaa
Jo naam dil meN rahaa zehn se utar bhii gayaa
PhaTii-phaTii huyii aaNkhoN se yuuN na dekh mujhe
Tujhe talaash hai jis kii vo shaKhs mar bhii gayaa
Magar falak kii adaavat usii ke ghar se na thii
JahaaN ‘Faraz’ na thaa sail-e-Gham udhar bhii gayaa
