Ghalib Ayaz and ILHAAMI AAYAAT 6:14 pm
Phul, khushbu, sahaab honaa to
Ae du’aa mustajaab honaa to
Main gahan tak tujhe na lagne duN
Tum mera maahtaab honaa to
Manzilen intezaar meN hoNgi
Hauslo!! ham rekaab honaa to
Waaqif e sard o garm bhi hona
Haami E inqelaab honaa to
Nuqs tujh me bhi sab nikaleNge
Ek zara kaamyaab honaa to
MaiN use dekh kar hi jita huN
Ho gaya us ka khaab hona to?
Ghalib Ayaz and ILHAAMI AAYAAT 3:05 pm
Husn ke zer E baar ho K na ho!!
Ab ye dil be-qaraar ho K na ho
Marg E amboh dekh aate haiN!!
AaNkh phir ashkbaar ho K na ho
Karb E paiham se hogaya pat_thar
Ab ye seenaa figaar ho K na ho
Phir yahi rut ho ain mumkin hai
Par teraa intezaar ho K na ho
Shakh E zaitoon ke amiN hum haiN
Shahr meN ishtehaar ho K na ho
DaaGh E dil hum dikhaye jate haiN
Us pe hai – Sharmsaar ho K na ho
She’r mere saNbhaal kar rakhna!
Ab ghazal mushkbaar ho K na ho
Ghalib Ayaz and ILHAAMI AAYAAT 4:04 pm
ChaNd meN jo pariyaaN rahti haiN
Hum ko milte dekh chuki haiN
In aankhoN me kyuN rahti ho ??
Jo har dam roti rahti haiN
Laakh nikaaluN dil se lekin
Khaab nigoRe sab ziddi haiN
Us malakooti husn ke, logo
Jitne Dhab haiN, aafaaqui haiN
Aaj jise sun kar tum roye
Wo baateN mujh per beeti haiN
Ghalib Ayaz and ILHAAMI AAYAAT 6:44 pm
Kab hawaa E sitam se darte the
Khaahish E rang O boo jo karte the
Us gali meN kabhi na khaak uRe
Be sabab jis se hum guzarte the
Uski yaadeN udaas karti thiN
Uski yaadoN se hi saNwarte the
Ek aisa bhi daur guzraa hai
Log aapas meN pyaar karte the
Jaane kya mashGhalaa hai ab unka
Zindagi meN jo rang bharte the
Ghalib Ayaz and ILHAAMI AAYAAT 5:59 pm
Abke ye ehteyaat bhi kar jaanaa chaahiye !!!
Andhi se qabl khud hi bikhar jaanaa chaahiye
Haan jab mujhe jamood ki tohmat hi mil gayi
To dil se bhi khayaal E safar jaanaa chaahiye
Sab raaste hisaar ke jangal meN qaid haiN
Kya faisla kareN K kidhar jaanaa chaahiiye
Rahzan to sab kamaayaa jua maal le gaye
Ab sirf jaan leke na ghar jaanaa chaahiye
Karte haiN be sabab hi khataayeN ma’aaf jo
Aise “khataa ma’aaf” se dar jaanaa chaahiye
Kuchh faisle to hoNge mere ikhtiyaar ke
Aankhon se ye Ghilaaf utar jaanaa chahiye
Jab mere paas us ke liye chhat talak nahi
Ae uski aarzoo, tujhe mar jaanaa chaahiye
Ghalib Ayaz and ILHAAMI AAYAAT 5:34 pm
Jab bhi meraa ehtesaab hogaa
Sach se bahut ijtenaab hogaa
*~*
Phir band palak pe tez dastak
Jaane do, koi khaab hogaa
*~*
Kya soch ke jashn hum manaayeN
Kya ab na koi azaab hogaa !!??
*~*
Hai jurm meri samaa’atoN ka
Qaul uska kyuN kharaab hogaa
*~*
HaiN ma’aaf unke QahQahe! aur
AahoN kaa meri hisaab hogaa
*~**~**~*
Ghalib Ayaz and ILHAAMI AAYAAT 4:16 pm
Khush numa lafz ki sawaari bas
Shahr walon ko ek madaari bas
Ishq me aur kya hua hum se
Dhang se ki hai ashk baari bas
Ek nauras kali ka gul banna
Zindagi!! teri payedaari bas
Fasl e gul kaynat ki, mujh ko
Teri chahat ki aik kyaari bas
Manzilen ghair ke liye makhsus
Apne hisse me khaabkaari bas
Ek bejaan muskurahat hai !!!!
Oonche logon ki inkesaari bas
Aur kiyaa seekhte zamaane se
Hogaye hum bhi kaar O baari bas
Ghalib Ayaz and ILHAAMI AAYAAT 4:59 pm
JahaaN kharaab sahi hum, badan dareedaa sahi
Teri talaash me nikle haiN, paa bureedaa sahi
Jahaan E she’r meN meri kayee riyaasateN haiN!
MaiN apne shahr me gumnam O na shuneedaa sahi
Bhale hi chhaaoN na de, aasraa to detaa hai
Ye aarzu ka shajar hai, khazaaN raseedaa sahi
Inhi bujhi hui aankhoN me khaab utreNge
YaqiN na chhor, ye bimaar O shab gazeedaa sahi
DiloN ko joRne waali Ghazal salaamat hai
Ta’alluqaat hamaare agar kasheedaa sahi
Mere beGhair har ek daastaaN adhoori si
MaiN us kitaab me ek lafz E khat-kasheeda sahi
Ghalib Ayaz and ILHAAMI AAYAAT 12:20 pm
Sehn E maqtal ki aabroo hum the
Qatl ke waqt baa-wazoo hum the
Yeh nadee ab kise bulaati hai?
Pahle to is ki justajoo hum the
Apni basti ko yaad hai ke nahiN
Uski galiyoN ki haau-hu hum the
Tishnagii de rahi thi sairaabi!!
Pyaas k din kanaar E joo hum the
Apne kuchh khaab yad aane lage
Raat maazi ke ru baroo hum the
Jaane kis baat pe vo rooth gaye
Hum nawaalaa the hum sobu hum the
Ghalib Ayaz and ILHAAMI AAYAAT 4:30 pm
Us ne haNs kar hameN pukaaraa kya
Ho gayaa phir se woh hamaaraa kya?
Jashn sa shahr e jaaN me kaisa hai
Aa raha hai wo maah paaraa kya?
Aarzoo, khaab, aas, mahroomii !!
Hausla phir bhi hum ne haaraa kya
Meri aankheN udaas rahti haiN
Ab na aaye ga wo dobaaraa kya?
AsmaaN par nazar nahi aataa
Khogaya hai mera sitaaraa kya
Dard ki saltanat pe baithaa hai
Koi farma-N-rawaa dobaaraa kya
Ae dil e beqarar - rahne de!!!
Shahr e taskeen me hamaaraa kya
Chaar aansu bahake sab chup hain
RayegaaN qatl hai hamaaraa kya
