Lashkar E Ishq Ne Jab Se Kheeme Kiye …



Lashkar E ishq ne jab se kheeme kiye, kuchh na kuchh roz sarhad baRhaa li gayi
Aur phir ek din mere dil ki zameeN,  dard ki mamlekat meN milaa li gayi


Raat ko ruk k sehraa jagayaa gaya, jab thakan se badan ki tanaabeN giriN
Apne haathoN k takiye banaye gaye,  apni mitti ki chadar bichhaa li gayi


Ek chiRiyaa ki aawaaz aati rahi mere bachchoN ko mujh se chhuRaayaa gaya
Meri basti se mujh ko nikaalaa gaya, mere jangal me basti basaa li gayi


Dast E khaali pe kya hausla kijiye, kaise jeene ki Qeemat adaa kijiye
Abke darbaar meN nazr E sar bhej kar bach nikalne ki surat nikaa li gayi


Kucha E rahzanaaN se guzarte hue, kuchh lutaanaa bhi tha kuchh bachaana bhi tha
Apni sadiyoN ka sona lutaaya gaya apni khaaboN ki jannat bachaa li gayi


Khatm hota hai us raat ka majraa, ab ye kya poochte ho k phir kya hua
Phir chiraGhoN ki aaNkheN bujha di gayiN, phir guloN ki zabaaN kaat dali gayi


Saare manzar Ghubaar E pas E kaarwaaN hogaye, baam O dar sab dhuaaN hogaye
Ab munaajaat ka waqt  hai ghar chalo! sair ki jaa chuki, khaak uRaa li gayi



Advertisements

11 thoughts on “Lashkar E Ishq Ne Jab Se Kheeme Kiye …

  1. Irfan Siddiqi Sahib ka kalaam parHa,bahot bahot achcha laga. Jitni taareef kar sakein kam hogee. Mushkil Behron mein bhi kya ghazab ki ravaanee hae. Aise aise khoobsoorat aur umda kalaam ke liye Sau Bar Shukriyaa.

    • Thanks for comment. Beshak unka kalam urdu adab mein ek qeemti asaasaa hai. Agar aap urdu parhna jante hain to main aap ko unki GhazloN ka intekhab (in PDF. format) bhi bhej sakta hun. Blog par aate rahiye apni mufeed aaraa ke saath.

  2. Yeh meyree kamnaseebee hee hae ki maen Urdu likhna parhna na seekh paaya,lekin Urdu zabaan aur shayari ke sath kis hadd tak mohabbat hae,bayaan nahin kar sakta.Wajah,ki merey vaalid marhoom eik bahot achchey shayar they. Shukriya.

    • Prem bhai… aap jaise log jab tak hain urdu ko koi khatra nahi. aap ke comments bahut khubsurti se likhe gaye hain. Rahi baat urdu na parh paane ki, to hum dua kareinge k aap ko koi aisa dost mile jo aap ke is shouq ki laj rakhe, aur bus alphabet samajhne ki der hai.. aap ko urdu khud ba khud aajayegi. App kis shahr se hain?

  3. Jee,aap agar mujhey naye comments aur posts sey ba-zariya email update rakhein gay to bahot mashkoor hoon ga.Hindi(Devnagri) aur English alphabet mein likhe gaye kalaam,ba-khoobi parh samajh sakta hoon.Nawaazte rahiyega.

    • Jab aap ye website kholte hain to safhay ke neeche dekhiye, Follow ka ek moving button hoga. us par click kariye aur apni email dal dijiye. Dusri surat yeh hai k “Follow Blog via Email” dayein column mein maujood hoga. Us mein diye gaye box par apni email id likh kar send kariye. Aap ko karna bus yeh hoga k ek dafa apna inbox check karna hoga aur us mein maujood ek automated link ko click karna hoga. Yeh dar asl ek verification process hai

  4. Upar likhhi iss ghazal key aakhiri sheyr key pehle missrey ko baar baar parha (tehat mein bhi aur tarrannum mein bhi).Aisaa mahsoos hua kaheen chhapne mein kuchh bhool hae. Ain mumkin hae yeh meyree hee nasamajhee ho.Ghaur keejega.

    • Aaap ne jis misray ki taraf ishara kiya hai woh parhne mein zarur ghalat lagta hai magar hai bilkul sahi. Meri maloomaat poetry metre ke bare mein bilkul sifar hain magar main ne expert logon se suana hai k yeh misra wazan mein hai. Misre ko do hissoN mein baNt kar parhiye
      Saare manzar Ghubaar E pas E kaarwaaN
      hogaye, baam O dar sab dhuaaN hogaye

    • Shukriya, Please send an screenshot for it if you have read it in print. Ghubar o DhuaN ki tarkeeb sahi nahi, aur mujhe nahi lagta k Irfan saheb ne aisa likha hoga. Mere pas jo book hai us mein waisa hi likha hai

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s