Khaab Ke Phoolon Ki Taabirein Puraani Hogayin

Khaab ke phooloN ki taa’beereiN puraani hogayiN

Khoon Thanda paR gaya aaNkhein puraani hogayiN

Jis ka chehraa tha chamakte mausamoN ki aarzoo

Us ki tasviireiN bhi auraaQ e Khazaani hogayiN

Dil bhar aaya kaGhaz-e-khaali ki surat dekh kar

Jin ko kahna tha woh sab bateiN zabaani hogayiN

Jo muqaddar tha usay to rokna bus mein na tha

Un ka kya karte jo baateiN naagihaani hogayiN

Rahgaya Mushtaq dil meiN rang-e-yad-e-raftagaN

Phool maNhgay hogaye QabreiN puraani hogayiN

(By: Ahmad Mushtaq)

Yeh Kehna To Nahi kaafi K Bus Pyaaray Lage Hum Ko

Yeh kahna to nahi kaafi K bus pyaare lage hum ko

Unhein kaise bataayein hum K woh kaise lage hum ko

MakeeN the ya kisi khoyi hui jannat ki tasveereiN

MakaaN us shahr ke bhoole hue sapne lage hum ko

Hum un ko soch mein gum dekh kar wapas palaT aaye

Woh apne dhyaan mein baithe hue achchhe lage hum ko

Bahut shaffaf the jab tak K masroof-e-tamanna the

Magar is kaar-e-duniya mein baRe dhabbe lage hum ko

JahaaN tanha hue dil mein bhaNwar se paRne lagte hain

Agar_che muddatein guzreiN kinare se lage hum ko

(Ahmed Mushtaq : From AaNkheiN Purani HogayiN)

Yeh Rang Yeh Raushni Yahin Hai

Ye rang ye raushni yahiN hai

Aage koi sehar nahiN hai

Lagte haiN ye pair dekhe bhale  

Shayad wo gali yahiN kahiN hai

Ya ek fareb hai muhabbat

Ya mere naseeb meN nahiN hai

Hai roop magar kisi kisi per  

Hai dhoop magar kahaIN kahiN hai

Saayaa hi nahi raha hai ‘Mushtaq’

Deewaar to aaj bhi wahiN hai

 
by : AHMAD MUSHTAQ

Mil Hi Jaayega Kabhi, Dil Ko Yaqeen Rahta Hai …


Mil hi jaayega kabhi,   dil ko  yaqeeN rahta hai

Wo isi shahr ki galiyoN mein kaheeN rahta hai

Jis ki saansoN se mahakte the dar O baam tere

Ae makaaN bol, kahaN ab wo makeeN rahta hai

Ek zamaana tha K sab ek jagah rahtay  the

Aur ab koi kaheeN, koi kaheeN rahta hai

Roz milne pe bhi lagta hai ja jug beet gaye

Ishq mein waqt ka ehsaas naheeN rahta hai

Dil fasurdaa to hua dekh ke usko lekin

Umr bhar kaun jawaaN, kaun haseeN rahta hai

(By: Ahmad Mushtaq)