Main Umr Ke Rastay Mein Chup Chaap Bikhar Jata

 

Main umr ke rastay mein chup-chap bikhar jata

Ek din bhi agar apni tanhai se dar jata

Main tark e ta’alluq pe zinda huN so mujrim huN

Kash uske liye jeeta!! apne liye mar jata

Kal saamne manzil thi peechhe meri aawazieN

Chalta to bichhaR jata, rukta to safar jata

Main shehr ki rounaq mein gum ho ke bahut khush tha

Ek shaam bacha leta, ek roz to ghar jata

Uss jaan e takkallum ko tum mujhse to milwatay

Tas_Kheer na kar pata, hairaan to kar jata

(Azm Behzad)

Kahin Goyaayi Ke HaathoN Samaa’at Ro Rahi Hai …

(Aaj yani 4 March 2011, ko Azm Bahzad sahab hamare beech se rukhsat hogaye. Unki yeh ghazal unko khiraj e aqeedat ke taur par. Khuda unhen jannat me uncha maqaam ata kare)

KahiN goyaayi ke haathoN samaa’at ro rahi hai
KahiN lab bastaa rah jaane ki hasrat ro rahi hai

Kisi deewaar par nakhun ne lik_kha hai rihaayi
Kisi ghar meN aseeri ki aziyyat ro rahi hai

KahiN member pe baiTha hai ek sajde ka nashsha
Kisi mehraab ke neeche ibaadat ro rahi hai

Yeh maathe par paseene ki jo larzish tumne dekhi
Yeh ek chehre pe laa-haasil mushaqqat ro rahi hai

Ajab mahfil hai sab ek dusre pe haNs rahe haiN
Ajab tanhaayi hai khilwat ki khilwat ro rahi hai

Yeh khamoshi nahi, sab iltejaayeN thak chuki haiN
Yeh aaNkheN tar nahi, rone ki himmat ro rahi hai

Jo ba’ad az hijr aaya, us ko kaise wasl kah duN?
Shikaayat se gale mil ke nidaamat ro rahi hai

Ise ghussa na samjho! ‘Azm’ yeh mere lahoo me
Musalsal zabt karne ki riwaayat ro rahi hai

 

Us Raah Pe Jaane Se Pahle Asbaab …


Us raah pe jaane se pahle asbaab sanbhaal ke rakh lena
Kuchh ashk firaaq se le lena kuchh phool visaal ke rakh lena

Ek umr ki mahroomi apne seene meN chhupaana mushkil hai
Jab hadd E wazaahahat aajaaye, yeh teer nikaal ke rakh lena

Ek hairat dil meN jhaNkegi, aaNkhoN meN sitaare TaaNkegi
Jo aaNsoo tum par bhaari hoN daaman me uchhaal ke rakh lena

Ek aisi chup  taari  karnaa jaise  goyaayi se ‘aari ho
Khaamoshi ke gahwaare me aawaazeN paal ke rakh lena

Chehre se khushi saabit karna jaise har dukh se ghaafil ho
HaaN baab E takhatub aaye to alfaaz malaal ke rakh lena

Woh shaam bahut jald aayegi jo tum ko tum se milaayegi
Us shaam tum apni aahoN se kuchh naGhme dhaal ke rakh lena

Is kaar E jahaaN ki wahshat par jab koi dastaawez likho
Sab se aakhir meN kuchh safhe apne ahwaal ke rakh lena

Taa’eed ke sannate se uTho, tardeed ke shor meN aajaao
Ek talkh jawaab se behtar hai ilzaam sawaal ke rakh lena

Ye khaboN, zakhmoN, daaGhoN ki tarteeb munasib hai lekin
Is zaad E safar meN ‘Azm’ kahiN kuchh sadme haal ke rakh lena

Ae Iraado! Mujhe Takmeel Ki Taaseer Dikhaao …


Ae iraado!!!  Mujhe takmeel ki taaseer dikhaao


Khab maiN dekh chuka huN mujhe taa’beer dikhaao


Kaahisho!! AaNkh se bahti hui hasrat na bano


Waqt badla hai to badli hui tasveer dikhaao


Raasto!! Mere liye manzileN aasaaN kardo


Tum mere zer E Qadam rahne ki tauqeer dikhaao


Waahimo!! Hadd E yaqeeN pe mujhe hairaaN na karo


Arsaa E shak se guzar jaane ki tadbeer dikhaao


Hauslo!! Jang ki haalat ko badal kar dekho


MaiN sipar dekh chuka huN mujhe shamsheer dikhaao


Zaaviyo!! Husn E lab O chasm nahi hai kaafi


Qaid karne ke liye duusri zanjeer dikhaao


Faaslo!! Qurb ke lamhoN me yeh doori kaisi


Yahi hoga to mujhe safha E taqdeer dikhaao


Faislo!! Baar E virasat hai mere shaanoN par


Jis ka haQdaar huN mujh ko wohi jaageer dikhaao


RaunaQo!! ‘Azm’ ki aaNkhoN me chamakne k liye


Is bayaabaaN meN kisi shahr ki taameer dikhaao


Vus’At-e-chashm Ko …


Vus’At-e-chashm ko andoh-e-basaarat lik’kha
MaiN ne ik vasl ko ik hijr ki Haalat lik’kha

MaiN ne lik’kha k Saf-e-dil kabhi KHaali nah huii
Aur KHaali jo huii bhi to malaamat lik’khha

Sirf aavaaz kahaaN tak mujhe jaari rakhti
MaiN ne chup saadh li, san’naTe ko Aadat lik’kha

Yeh safar paaoN hilaane ka nahiiN aaNkh ka hai
MaiN ne is baab meN rukne ko masaafat lik’kha

MaiN ne dastak ko likha kash-ma-kash-e-be-KHabari
Jumbish-e-pardaa ko aane ki ijaazat lik’kha

Likhne vaaloN ne to hone ka sabab lik’kha hai
MaiN ne hone ko nah hone ki vazaaHat lik’kha

Ashk agar sab ne likhe, maiN ne sitaare lik’khe
Aajizii sab ne likhi, maiN ne ibaadat lik’kha

ZaKHm likhne ke liye maiN ne likhi he Ghaflat
Khuun likhna tha magar maiN ne Haraarat lik’kha

Koii aasan rafaaqat nahiiN lik’khi maiN ne
Qurb ko jab bhi likha juzv-e-raqaabat lik’kha

MaiN ne KHushbu ko likha dast-ras-e-gum-shudagi
Rang ko faaslaa rakhne ki riAayet lik’kha

Husn-e-goyaaii ko likhna tha, likhi sargoshi
Shor likhna tha so aazar-e-sama’At lik’kha

MaiN ne parvaaz likhi hadd-e-falak se aage
Aur be-baal-o-pari ko bhi nehayet lik’kha

MaiN ne tA’biir ko teHriir meN aane nah diya
Khaab likhte huye moHtaaj-e-bashaarat lik’kha

Mere sar par kabhi afsos ka saayaa nah rahaa
Ranj tha jis ki jagah maiN ne shikaayat lik’kha

Itne dA’voN se guzar kar yeh KHayaal aataa hai
‘AZM’ kya tum ne kabhi Harf-e-nidaamat lik’kha

Raat ek mehfil meiN …

Raat ek mehfil meiN guft_guu namu par thii
Har zubaan thii saakit, har nigaah pat_thar thii

Ek savaal kii lou se hoNT jhulse jaate the
Ek javaab kii ThanDak aah ke baraabar thii

Ek be-yaqeeN lehja khouf se larazta tha
Ik Chhupi huii hairat, hairatoN se baahar thii

Voh sukhan zubaN par tha jis ko dil meiN rehna tha
Voh shikan jabeeN par thii jo adaaye bistar thii

MaiN bahut hirasaaN tha zakhm ke na bharne se
Ek shab kii mohlat thii aur jang sar par thii

Shaakh-e-dil kii haryaali khaab ka bayaaN Thehri
MaiN ne jis ko nam rak_Kha voh zameeN hii banjar thii

Mujh meiN ek darya hai jo bipharta rehta hai
Pehle ek Sehra tha jis pe chup kii chaadar thii

MaiN ne us ko har lamha jism se pukaraa tha
Ab Khula keh voh khaahish ruuh ke baraabar thii

Ishq kii karaamat hai varnaa umr ke haathoN
Khaal-o-khad kii veeraani husn ka muqaddar thii

Kya huye voh lab jin se phool hii baraste the
Kya huii voh shaadabi jo hameiN muyassar thii

AZM be-sabab dekhha tum ne khaab-e-sairaabi
Dasht ke tasalsul meiN tashnagi hii behtar thii

Kitne mousam sargardaaN the …

Kitne mousam sargardaan the mujh se hath milane main
Main ne shaayed dair lagadi khood sey baahar aane  main

Ek nighah ka san’nata hai ek aawaaz ka banjar pan
Main kitna tanha baitha hun qurbat ke veerane main

Bistar se  karwat ka rishta toot gaya ek yaad ke saath
Khaab sarhane se uth baitha takiye ko sarkaney main

Aaj uss phul ki khushbu mujh main paiham shor machati hai
Jis ne be had ujlat barti khilne  aur murjhaane  main

Baat banaane wali ratein rang nikharne wale din
Kin rastoN par chhoR aaya main umr ka sath nibhane main

Aik malal ki gard samete  main ne khood ko paar kia
Kaise kaise wasl guzare hijr ka zakhm chhupane main

Jitne dukh the jitni umeedein, sab se brabar kam liya
Main ne apne aayinda ki ek tasweer banaane main

Aik wazahat ke lamhe  main mujh par ye ahwaal khula
Kitni mushkil paish aati hai apna haal bataane  main

Pahlay dil ko aas dilaa kar beparwaaa ho jata tha
Ab to Azm bikhar jata hun main khud ko bahlane main