Rona Gana PaR Jata Hai

Ronaa gaanaa paR jata hai
Ishq to maNhga paR jata hai

TaabereiN aage chalti hain
Khaab akelaa paR jata hai

Main bhi shahr e wafa jaaunga
Kitna kharchaa paR jata hai?

DeewareiN jab girne ko hoN
Dar per jaalaa paR jata hai

 Ek din ankheiN thak jati hain
Ek din ronaa paR jata hai

Tu na ho to dil ka aaNgan
Kaisa soona paR jata hai!

(Ghalib Ayaz)

Advertisements

Kisi Taveel Musafat Mein Rahnuma Si Khaak

Kisi taveel musaafat mein rahnumaa si khaak

Hamaare saath musalsal hai aashnaa si khaak

Teraa khyaal k hai tezz aaNdhiyoN pe muheet

Mere wajood ka hissaa, faqat zaraa si khaak

Mataa’-e-ashk bahut kam hai paas aankhoN ke

Idhar hai khitta-e-jaaN ki bahut hi pyaasi khaak

Dayaar-e-jaaN ki sayahat humaiN na raas aayi

URa rahi thi wahaN har taraf udaasi khaak

Woh mujh pe dhool uRaakar guzar gaya shayed

Ulajh gayi hai nigahoN se khushnuma si khaak

 (Ghalib Ayaz)

Hisaab E Ishq Mein Thora Zayaan Kiya Jaye

Hisaab e ishq mein thora zayaaN kiya jaye

Kabhi kabhaar use bad-gumaaN kiya jaaye

Koi badan mere she’roN ka iste’aara ho

Kisi ke lams ko ab javidaaN kiya jaye

Zeyaada rakkha nahi nazar pe baar e visaal

Mataae deed ko kyuN raayegaaN kiya jaye

Isi talab mein meri zaat hogayi khaamosh

K mujh ko tere laboN se bayaaN kiya jaye

Samaa’atein hain yahan be yaqeen logoN ki

Hamaara zikr pas e daastaaN kiya jaye

Dyaar-e-khaab ki gum-gashtagii se achchha hai

Tavaaf e koocha naa mehrbaan kiya jaye

(Ghalib Ayaz)

UnhiN Ko Raah E Talab Khaar Daar Di Gayi Hai

انہی کو راہِ طلب خار دار دی گئی ہے
وہ جن کو مملکتِ اعتبار دی گئی ہے

ذرا سی دیر تو سو لیں یہ اہلِِ دل کہ انہیں
بہت طویل شبِ انتظار دی گئی ہے

گئے دنوں میں ہمارا تھا قصرِ خوش آثار
اب اپنے نام کی تختی اتار دی گئی ہے

لہو لہان اجالوں کا دن ڈھلا آخر
سیاہ کرب زدہ شب گزار دی گئی ہے

ہمارے پاس تھا کیا خواب وہ تو ٹوٹ گیا
اک اور چیز تھی جان’تجھ پر وار دی گئی ہے

ہماری دشت نوردی کو اک فسانے میں
بشارتِ شجرِ سایہ دار دی گئی ہے

غالب ایاز

 

UnhiN ko raah e talab khaar daar di gayi hai

Woh jin ko mamlekat e aetebaar di gayi hai

Zara si der to solein yeh ahl e dil K inhein

Bahut taveel shab e intezaar di gayi hai

Gaye dinoN meN hamara tha Qasr e khush aasaar

Ab apne naam ki takhti utaar di gayi hai

Lahoo lahaan ujaaloN ka din dhalaa aakhir

Siyaah, karb-zada shab guzaar di gayi hai

Hamaare paas tha kya khaab, woh to toot gaya

Ek aur cheez thi jaaN, tujh per waar di gayi hai

Hamaari dasht navardi ko ek fasaane mein

Bashaarat e shajar e saaya daar di gayi hai
(Ghalib Ayaz)

Raag Mein Rang Mein Khushbu Mein

Raag mein rang mein khushbu mein nahaayi hui raat

ORhh lii hai teri yaadoN se sajaayi hui raat

Kya koi sho’la-e-khush-rang chhupa hai mujh mein

Laut jaati hai dar-e-chashm pe aayi hui raat

Ab mere hujraa-e-wahshat mein ammaN chahti hai

Rang aur noor ke haathoN yeh sataayi hui raat

Ho gayiN phir se tahi-dast hamaari aaNkhein

Subh par hum ne lutaadi hai kamaayi hui raat

Mo’jezaa-gar thi teri sard-nigaahi sar-e-shaam

Kitne khaaboN ki mere dil se rihaayi hui raat

Hum har ek cheez ko pur noor samajh baithe hain

Jab se hai khitta-e-ehsaas pe chhayi hui raat

(Ghalib Ayaz)

Kabhi Guman Kabhi Aetebaar Ban Ke Raha

 

Kabhi gumaan,  kabhi aetebaar ban ke raha

Dayaar e chashm mein wo intezaar ban ke raha

Hazaar khaab meri milkiyat mein shamil the

MaiN tere ishq mein sarmaya daar ban ke raha

Tamaam umr  use chaahnaa na tha  mumkin

Kabhi kabhi to wo is dil pe baar ban ke raha

Usi ke naam karuN maiN tamaam ahd e khyal

Daroon e jaaN jo mere sog-waar ban ke raha

Agarche shahr meiN mamnu’ thi himaayat e khab

Magar yeh dil sabab e inteshaar ban ke raha

(Ghalib Ayaz)

Bas Ek Khyal Hai Taskeen E Jaan Hamare Liye …

Bas ek khyaal hai taskeen E jaaN hamare liye
Zamane bhar se koi bad gumaaN hamare liye

Jo tera lams mile to khule yeh baab E wajood
Aur is mein ho tu kabhi mayhmaaN hamare liye

Hum us pe khaab ki soorat utarne waale hain
Sajaye aaNkh mein wo kahkashaaN hamare liye

Udaas hochuke lamhoN mein rang bharti hui
Hawaaye shaam hai na-mehrbaaN hamare liye

Nateejatan hamaiN mahroom e khaab hona paRa
HaqeeqatoN ne kaRe imtehaaN hamare liye