Inkaar Mein Iqraar Ki Baat Aa Hi Gayi Hai

Inkaar meiN iqraar ki baat aa hi gayi hai
BatoN meiN Gham-e-yar ki baat aa hi gayi hai

Aaya hai kabhi zikr agar dar-o-rasan ka
Gesoo-o-qad-e-yar ki baat aa hi gayi hai

Jab surKhi-e-gulshan ka kabhi zikr hua hai
Tere lab-o-ruKhsaar ki baat aa hi gayi hai

DhooNda hai agar zaKhm-e-tamana ne mudaawa
Ek nargis-e-bimaar ki baat aa hi gayi hai

Mil baiThe haiN zandaaN meiN agar sham ko ahbab
Tere dar-o-deewaar ki baat aa hi gayi hai

ChaiRa hai koi talKh fasaana jo kisi ne
Shirini-e-guftaar ki baat aa hi gayi hai

(Mazhar Imam)

Advertisements

Tu Hai Gar Mujh Se Khafaa, Khud Se Khafaa Hun …

(Our Beloved poet Mazhar Imam passed away on yesternight 11.30 on 30th Jan 2011. Pray for the peace of his soul. He was born in 1928 in Bihar’s Darbhanga district. He spent a glorious life and served Urdu literature. This famaous Ghazal written by him is a tribute.)

 

Tu hai gar mujh se khafa khud se khafaa huN maiN bhii
Mujh ko pahchaan K teri hi adaa huN maiN bhii

Aek tujh se hi nahiN fasl E tamannaa shaadaab
Vohi mausam huN vohii aab O havaa huN maiN bhii

Sabt huN dast E Khamoshii pe hinaa kii suurat
Naashunidaa hi sahii teraa kahaa huN maiN bhii

ChaaNd ban kar tere aaNgan meN utar hii jaauN
Raat ke pichhale pahar maaNg duaa huN maiN bhii

YuuN na murjhaa K mujhe Khud pe bharosaa na rahe
Pichhle mausam meN tere saath khilaa huN maiN bhii

Jaane kis raah chaluN, kaun se ruKh muR jaauN
Mujh se mat mil K zamaane ki havaa huN maiN bhii

Yeh Tajrubaa Bhi Karun …

 

Ye tajrubaa bhi karuN, ye bhi kar dikhaauN maiN
K Khud ko yaad rakhuN us ko bhul jaauN maiN

Fareb-kaar meN kuchh to hai, koi baat to hai
K jaan boojh ke itne fareb khaauN maiN

Vo pal kahaN haiN jo duniyaa se joRta tha mujhe
Jo paauN tujh ko to sab ke qarib aauN maiN

Kabhi to ho mere ehasaas E kam-tari meN kami
Kabhi to ho K use khul ke aazmaauN maiN

Vo shaKhs hai K nasim E sahar ka jhoNkaa hai
Bikhar hi jaauN jo us ko gale lagaauN maiN

AzaaN ke baad duaa ko jo haath uThaaye voh
‘Imam’ apani namaazeN bhi bhul jaauN maiN

 

Nigaah O Dil Ke Pas Ho Woh Apna Aashnaa Rahe …

Nigaah O dil ke pas ho wo apna aashnaa rahe
Hawas hai ya K ishQ hai yeh kaun sochta rahe

Woh mera jab na hosaka to phir yahi saza rahe
Kisi ko pyar jab karun woh chhup ke dekhta rahe

Mana to us ko luN magar yeh silsila bhi kya rahe
Alag hai is ka zaaiQa K woh khiNcha khiNcha rahe

Mashaam E jaaN pe khushbuoN ki jab phuwar hi na ho
Hazaar baat baat meN woh phool TsaNktsa rahe

Shaguftan E jamaal ko hijaab E lams chaahiye
Faseel E shab ki oat meN chiraaGh yeh jala rahe

Na itni door jaaiye  K log poochhne lagaiN
Kisi ko dil ki kya Khabar, ye hath to mila rahe

Dil Akelaa Hai Bahut Laalaa E Sehraa Ki Tarah …


Dil akelaa hai bahut laalaa E sehraa kii tarah


Tum ne bhi chhoR diya hai mujhe duniyaa kii tarah


ChhoR ke jaao na yuuN ahd E guzishtaa kii tarah


Ban ke ummeed raho waadaa E fardaa kii tarah


Tum havaa ho to bikhero mujhe saahil saahil


Mauj E mai ho to bahaa do mujhe dariyaa kii tarah


Paas rahte ho to aataa hai judaayi kaa Khayaal


Tum mere dil meN ho andeshaa E fardaa kii tarah


Biich meN kuchh to rah O rasm E ta’alluq rakkho


Ajnabii yuN nahiN milate haiN shanaasaa kii tarah


Hai Bhare DarakhtoN Ke Ba Wajood Ban Tanha …


Hai bhare darakhtoN ke baa wajood ban tanha
Roz O shab k hangaame phir bhi anjuman tanha


RatjagoN ke woh saathi kis jahaaN meN baste haiN
Kya hamiN tak aayegi subh ki kiran tanha


Rah gayiN kahaaN pichhe gesuuoN ki barsaateN
Mere ghar tak aayihai boo E  yasman tanha


Wo to khair yuN kahiye, zauQ E husn hamdam tha
Jooye sheer kya laataa azm E kohkan tanha


Haaye yeh shab E vaadaa, dil ka haal kya kahiye
Hujla E uroosii meN jis tarah dulhan tanha


Jaane kis shabistaaN meN kaun jaagta hoga
Nisf shab ko nikli hia ek gulbadan tanha


(Extracted from : Rishta GuNge Safar ka)

Aazad Ghazal – Mazhar Imam …


Jin ke dil me rakhshindaa haiN ilhaami aayaat!!

Waqt ke bhari shaanoN pe wo rakh ke dekheN apna haath


Beej namak ke bone wale kheti meN masroof

Abke jaane kab tak thahre zakhmoN ki barsaat


Hum kya unki nazr kareN ab chehre pe aaNkheN hi nahi

Pahle dekar khush hote the ashkoN ki souGhat


Subh ka taRkaa hote hote uR jaate the lafzoN k sab rang

Jaag ke tujh ko khat likhte the aadhi aadhi raat


Aaj hua so hona tha (maiN ooNche ghar ki beti huN)

Dekho phir mat karna aisi waisi baat


Kitnaa garm lahoo hai apna duniyaa ko bhi dekhne deN

Rakhna hoNt pe hoNt aur dena haath me haath!!