Kya Wasl Ki Saa’at Ko Tarasne Ke Liye Tha

Kya wasl ki saa’at ko tarasne ke liye tha

Dil, shahr-e-tamanna tere basne ke liye tha

Sehra mein bagooloN ki tarah naach raha hun

Fitrat se maiN baadal tha barasne ke liye tha

Rotee hui ek bheeR mere gird khaRi thi

Shayad yeh tamaasha mere hansne ke liye tha

Kuchh raat ka ehsaaN hai na suraj ka karam hai

Guncha to bahar-haal bikasne ke liye tha

Us raah se guzra huN jahaN saaNs na de saath

Har naqsh-e-kaf-e-paa mere dasne ke liye tha

Har qatra meri aaNkh se bahne ko to tha betaab

Har zarra mere paaoN jhulasne ke liye tha

(Muzaffar Hanfi)

Zindagi Karne Ki Phir Tahreek Andar Se Hui …

Zindagi karne ki phir  taHreek andar se hui
Zakham bahar the, tabii’at theek andar se hui

Tu ne kyuN itni salakhaiN khiRkiyoN par taan diN
Dor saansoN ki teri baareek andar se hui

MaiN jisay baizaar ho kar choR aaya tha kabhi
Ab wohi basti bahut nazdeek andar se hui

Hum yeh samajhe the mu’mma zindagi ka hul hua
Aur phir paida nayee tashkeek andar se hui

Bhar liya hoga paRosi ka ujaala chheen kar
Aap ki qandeel kyuN tareek andar se hui

Kashmakash thi ae ‘Muzaffar’ is zamiN aur bahr me
Doob janay ki mujhay tahreek andar se hui

(Muzaffar Hanfi)

Mar Jaye Koi Un Ko Gham NaeeN Hona …

Mar jaaye koi un ko gham naeeN hona
Un doo ankhooN meiN nam naeeN hona

Pat_ta hai to lashoN se pat jaanay do
Dekho, is kuchay meiN mataam naeeN hona

Kala badal ghor nirasha ka hooN maiN
Pyaray tum bhi bijli sai kam  naeeN  hona

Jungle ka qanoon chalay ga, suntay haiN
Basti meiN adam wadam naeeN hona

Hum bhi istiqbal ko janay walay thai
Wo kahta hai kala parcham naeeN hona

Qatra hooN to shabnam rah kar ji loonga
Logo, mujh ko darya meiN zam naeeN hona

Wo mujh ko beshak Thanda kar saktai haiN
Aag ‘Muzaffar’ GhazloN meiN kam naeeN hona

 

 

Main To Bin Dekhe Bahal Jaunga …

Main  to bin dekhe bahal jauNga, lekin tum log
Toor kahta hai ke jal jauNga, lekin tum log

Khak se raabta rakhna tumheN manzoor nahi
MaiN to mitti men bhi ral jauNga, lekin tum log

Dagmagata jo nahi hai wo sambhalta bhi nahi
DagmagauN ga, sambhal jauNga, lekin tum log

Tum bhi charhte hue suraj ke pujari nikle
Ek pahar aur  hai! dhal jauNga, lekin tum log

Khud hi ek shola E jawwala huN mera kya hai
Bhujh ke us paar nikal jauNga, lekin tum log

Qaeda hai hai ke pighal jata hai jalne wala
Raoshni deke pighal jauNga, lekin tum log

Chiraagh Apne Hawa Dene Se Pahle …

ChiraaGh apne hawa dene se pahle
Jalaane the bujhaa dene se pahle

MiyaaN kya lazmi tha khaak uRana
Kisi ko raastaa dene se pahle

Naseem e subh ko aayaa paseena
KhazaaN ko bad dua dene se pahle

Mila sakte ho kya hum se nigaaheN
Baghavat ki sazaa dene se pahle

Munaasib hai K paRh li jaaye takhti
Kisi dar par sadaa dene se pahle

Hamaaraa haarna tai ho chukaa tha
Tumhaare haath utha dene se pahle

Sakhi mashhoor the hum bhi ‘Muzaffar’
Magar sab kuchh luta dene se pahle

Pur ShikastoN Ki Na ChheRo DaastaaN …


Pur shikastoN ki na chheRo daastaaN  is martabaa
BaiTh jaye ga yeh khastaa aasmaaN is martabaa


Dha chuki mera kharaabaa lekin ae reg E rawaaN
Itna Gham tu le ke jaye gi kahaaN is martabaa


Baat karna jurm hai  im-saal mere shahr meN
Aur zoroN par meri tab’ E rawaaN is martabaa


Kya khabar abke bhaNwar se hath nikle ya nahi
Dekhiye kya gul khilaye badbaaN is martabaa


Be salaaKh ab aik bhi khiRki nahi rah jayegi
Her taraf se uTh rahi haiN aaNdhiyaaN is martabaa


Wo dareechaa band hai pichhle baras aisa na tha
Door kitni ho gyee hai kahkashaaN is martabaa


Ae ‘Muzaffar’ jam’a hoNgai saari basti ke chiraaGh
Aag se bachnaa nahi koyii makaaN is martabaa


Khelo Phaag Langoti MeN …



Khelo phaag langoti meN
Uljhe daaRhi choti meN


Bikta dekha hai eemaan
Do boti  ek roti meN


Sach_che dar sach_che haiN hum
Saaraa khoT kasoti meN


Sab apnoN ka hissa hai
Meri tikka boti meN


Aaj ‘Muzaffar’ chaaNd hue
Kal tak the kajloti meN