Ghazals

 

*********

*********

*********

*********

*********

*********

*********

*********

*********

*********

*********

Teri rahmat athhaah! Ya Allaah

Main ghariq e gunaah Ya Allaah

Dur beeni ke par bahut chhote

Saazishen, be panaah Ya Allaah

Kitni aabaad hain kamin gaahen

Lut gayi khanqaah!! Ya Allaah

Kiya kare ab tera sipah saalaaar

Dar gayi hai sipaah!! Ya Allaah

Zindagi kitni jabr hai, phir bhi

Kyon hai jine ki chaah Ya Allaah

Aansuon ki pukaar ab sun le!!

Khol bakhshish ki raah Ya Allaah

(Published)

**********~*~**********

John alea ki zameen men”

Kucha e dilbaraaN ke the hi nahiN

Ahl us imtehaaN ke the hi nahiN

AndhiyoN ke amal dakhal me rahe

Hum kisi aashiyan ke the hi nahiN

Sah gaye rizq ke liye wo lafz !!

Jo hamari zabaN ke the hi nahiN

Chara gar se wo zakhm kya bharte

Jo adoo ki senaaN ke the hi nahiN

Jis ka anjaam khush nateejaa ho

Hum to us dastaaN ke the hi nahiN

Is tarah hum ne chhor dee duniya

Jaise pahle yahaan ke the hi nahiN

( Published )

**********~*~**********

Khush numa lafz ki sawaari bas

Shahr walon ko ek madaari bas

Ishq me aur kya hua hum se

Dhang se ki hai ashk baari bas

Ek nauras kali ka gul ban_na

Zindagi!! teri payedaari bas

Fasl e gul kaynat ki, mujh ko

Teri chahat ki aik kyaari bas

ManzileN Ghair ke liye makhsus

Apne hisse meN khabkaari bas

Ek bejaan muskurahat hai !!!!

Oonche logoN ki inkesaari bas

Aur kiyaa seekhte zamaane se

Hogaye hum bhi kaar o baari bas

(Published)

**********~*~**********

Bahte daryaa meN utar jana tha

Khaak the aur bikhar jana tha

Us se bichhRe to zamaanaa beeta

Ab talak zakhm ko bhar jana tha

Maan letaa huN tujhe hi manzil!!

Ab kahaaN yaad kidhar jana tha

Hausle ham ne bachakar rak_khe

Jab hameN had se guzar jana tha

Jaan !!! is hijr pe ronaa kaisa!!!

Ek din yuN bhi to mar jana tha

(Published)

**********~*~**********

Ek sookhaa saa shajar yaad aaya

Aaj bhulaa huaa ghar yaad aaya

ManzileN jab na muyassar aayeeN

Khushgumaani kaa safar yaad aaya

Ghar banaane ki thakan yaad aayi

Aur phir raqs e sharar yaad aaya

Uske hathoN meN kharasheN dekhiN

Tab hameN apna bhi sar yaad aaya !

Geet gaate hue logo, tum ko

Kya koi chaak jigar yaad aaya

**********~*~**********

Hawa ke hont khuleN, saa’at e kalaam to aaye

Ye ret jaisa badan, aandhiyoN ke kaam to aaye

Hamara sar na uthaaye wo apne sar se buland

Rayees shahr ko aadaab e qatl e aam to aaye

Use udaas na kar de ye meri tez ravee !!

Main abke sust chalun wo subuk kheraam to aaye

Munafeqat ki sabhi tohmateN mujhe dede

Mere tufail rafeeqoN meN tera naam to aaye

Gham e hayat, gham e rozgaar, be watani

Sakun se jo dhale koyi aisi shaam to aaye

( Published )

**********~*~**********

Abke ye ehteyaat bhi kar jaanaa chaahiye !!!

ANdhi se qabl khud hi bikhar jaanaa chaahiye

HaaN jab mujhe jamood ki tohmat hi mil gayi

To dil se bhi khayaal e safar jaanaa chaahiye

Sab raaste hisaar ke jangal me qaid haiN !!!!

Kiya faisla kareN k kidhar jaanaa chaahiiye !

Rahzan to sab kamaayaa hua maal le gaye

Ab sirf jaan leke na ghar jaanaa chaahiye !

Karte haiN be sabab hi khataayeN ma’aaf jo

Aise “khata ma’aaf” se dar jaanaa chaahiye

Kuchh faisle to honge mere ikhtiyaar ke !!!!

Aankhon se ye Ghilaaf utar jaanaa chahiye

Jab mere paas us ke liye chhat talak nahi !

Ae uski aarzoo, tujhe mar jaanaa chaahiye

( Published )

**********~*~**********

Aakhirash dil ne hi kamaal kiyaa

Uski dhaRkan se ittesaal kiyaa

Meri khush fahmiyaaN hi mujrim haiN

Tu ne kab mujh ko paayamaal kiyaa

Bhul saktaa thaa main tujhe lekin

Ghairat e ishq ka khyaal kiyaa

Aadmi, peR, saanp, sher, kunwaan

Hi chuhoN ne phir wabaal kiyaa

Aane waali rutoN se khauf aaye

Pichhli rut ne bhi paayamaal kiyaa

( Published )

**********~*~**********

Ab hai khush aur dukhi thi pahle

Wo mujhe dhunDh rahi thi pahle

Abto dukh sahke bhi hans leti haiN

Inhi aankhoN meN nami thi pahle

Mujh men utre ke wo azaad rahe

Zindagi soch rahi thi pahle

Aaj phir theek wahiN chot lagi

Jis agah chot lagi thi pahle

Ret hi ret bachi hai ab to

Ankh me aek nadi thi pahle

Shahrdarsharh ye ab raqs meN hai

Aaag jungal meN lagi thi pahle

Sochta rahta huN tanhaayi meN

Jane kis kis se bani thi pahle

**********~*~**********

Ye raat koi chal chal gayi hai

Jo neeNd bachi thi, jal gayi hai

AankhoN ka bahaao hai musalsal

Chhoti si nadii, ubal gayi hai !!

Mal’oon khezaaN ki shar pasandi

PhooloN ka badan masal gayi hai

Jis meN teri aas jaagti thi !!!!

Wo shaam rupahli dhal gayi hai

Tu jab se bani hai dil ki zeenat

Haalat hi meri badal gayi hai

Ash’aar Tapak rahe haiN paiham

Ek shaakh junuN ki phal gayi hai

**********~*~**********

Jis se milna tha mil nahi paayaa !!

Chaak daaman ka sil nahi paayaa

Kaisi barsaat hogayi abke !!!

Ek bhi phool khil nahi paayaa

Raaz afshaa karuN, are tauba

Itna kam zarf dil nahi paayaa

Chaand be daagh hai ! daleel is ki

Us ke ‘aariz pe til nahi paayaa

Saath khushiyoN ka sirf pal do pal

Dard bhi mustaqil nahi paayaa

Log hairaan horahe the bahut

Jab hameN muzmahil nahi paayaa

( Published )

**********~*~**********

Jab bhi mera ehtesaab hogaa

Sach se bahut ijtenaab hogaa

Phir band palak pe tez dastak

Jaane do, koi khaab hogaa

Kya soch ke jashn hum manayeN

Kya ab na koi azaab hogaa !!??

Hai jurm meri samaa’atoN ka

Qaul uska kyuN kharaab hogaa

HaiN ma’aaf unke qahqahe aur

AahoN kaa meri hisaab hogaa

( Published )

**********~*~**********

Gham hai ya ezteraar sa kuch hai

Yaa mujhe intezaar sa kuchh hai

Be sabab aur kaun bhatke ga

Dil hai aur be qarar sa kuch hai

Jab bhi chahun udas hojauN!

Khud pe ab ikhteyar sa kuch hai

Zindagi itni badnumaa to nahiN

Aayeene pe ghubar sa kuch hai

Ab gumaN ho raha hai manzil ka

Saamne regzaar sa kuch hai

HausloN ko abhi pata na chale

Raste me hisaar sa kuch hai !

Mere andar ki rut khezaaN jaisi

Voh mujassim bahaar sa kuchh hai

(Published)

**********~*~**********

JahaaN kharaab sahi hum, badan dareedaa sahi

Teri talaash me nikle haiN, paa bureedaa sahi

Jahaan E she’r meN meri kayee riyaasateN haiN!

MaiN apne shahr me gumnam O na shuneedaa sahi

Bhale hi chhaaoN na de, aasraa to detaa hai

Ye aarzu ka shajar hai, khazaaN raseedaa sahi

Inhi bujhi hui aankhoN me khaab utreNge

YaqiN na chhor, ye bimaar O shab gazeedaa sahi

DiloN ko joRne waali Ghazal salaamat hai

Ta’alluqaat hamaare agar kasheedaa sahi

Mere beGhair har ek daastaaN adhoori si

MaiN us kitaab me ek lafz E khat-kasheeda sahi

(Published)

**********~*~**********

Jab talak maiN rahaa, rahaa dukh bhi

Phir mere saath so gayaa, dukh bhi

Arz-E-Gham Taab-e-zabt kya laataa

Kah gaye hum Dhakaa chhupaa dukh bhi

Jashn E maqtal meN saath aa niklaa

HaaNptaa kaaNptaa huaa dukh bhi

Raat be chehragee ki nazr huyii

Warna aayeena dekhta dukh bhi

Gum the teri talaash me tinoN

Shahr tha, raastaa bhi tha, dukh bhi

**********~*~**********

Tere maqtal ki aabroo hum the

Qatl ke waqt baa-wazoo hum the

Yeh nadee ab kise bulati hai?

Pahle to is ki justajoo hum the

Apni basti ko yaad hai ke nahiN

Uski galiyoN ki haau-hu hum the

Tishnagii de rahi thi sairaabi!!

Pyaas k din kanaar e joo hum the

Apne kuchh khaab yad aane lage

Raat maazi ke ru baroo hum the

Jaane kis baat pe vo rooth gaye

Hum nawaalaa the hum sobu hum the

(Published)

**********~*~**********

Rahti thi aaNkh me jo nami khatm hogayi

Rasm-e-duaa-e- neem shabi khatm hogayi

Mere bhi jo usool the matrook hogaye

Teri kulaah se bhi kaji khatm hogayi

Ab aur zindagi ka fasana sunayeN kya

Tanha hui, udaas hui, khatm hogayi

Boseedgi ka husn mere dar pe chha gaya

Phir dastakoN ki daad rasi khatm hogayi

Sehn e chaman meN kaun subuk gaam aagaya

Baad E sabaa ki tez ravi khatm hogayi

Pichhli rutoN ki chaanv ne us ko bulaa liya

Ek mukhtasar si hamsafari khatm hogayi

AajayeN mere shahr e sukhan me tamaam log

Muzdaa! ke unki dar badari khatm hogayi

**********~*~**********

Husn ke zer e baar ho ke na ho!!

Ab mere dil me pyar ho ke na ho

Marg e amboh dekh aate hain!!!!

Aankh phir ashkbaar ho ke na ho

Karb e paiham se hogaya pat_thar

Ab ye seenaa figaar ho ke na ho

Phir yahi rut ho ain mumkin hai

Par tera intezaar ho ke na ho

Shakh e zatoon ke amiN hum hain

Shahr meN ishtehaar ho ke na ho

Daagh E dil hum dikhaye jate haiN

Us pe hai _ Sharmsaar ho ke na ho

She’r mere sanbhal kar rakhna!

Ab Ghazal mushkbaar ho ke na ho

**********~*~**********

Chhoti chhoti baat pe haNste rahte the

Beet gaye jo din! wo kitne achchhe the

Aj unheN dekha to aankheN bhar aayiN

Wo chehre jo khaab mahal me baste the

Jis se pyaar kareNge us ko paaleNge!!

Hum bhi kaisee bahki bateN karte the

Ab to apna ghar bhi yaad nahi aata

Pahli baar chhuta tha! kitna roye the

In haathoN se pat_thar bhi tore humne

Yahi kabhi teri zulf se khela karte the

**********~*~**********

Us ne hans kar hameN pukara kya

Ho gayaa phir se wo hamara kya?

Jashn sa shahr e jaaN me kaisa hai

Aa raha hai wo maah paaraa kya?

Aarzoo, khaab, aas, mahroomee

Hausla phir bhi hum ne haara kya

Meri aankheN udaas rahti hain

Ab na aaye ga wo dobara kya?

AsmaaN par nazar nahi aataa

Khogaya hai mera sitaaraa kya

Dard ki saltanat pe baithaa hai

Koi farma-N-rawaa dobaaraa kya

Ae dil e beqarar – rahne de!!!

Shahr e taskeen me hamara kya

Chaar aansu bahake sab chup hain

RayegaaN qatl hai hamara kya

**********~*~**********

Kabhi visaal kabhi intezaar karte hue

Kati hayaat yahi kar o baar karte hue

Wo apne zulm k fan me kamal e fan ki taraf

Hum unse rishtaa E dil ustawaar karte hue

Bachi jo umr to phir tere shahr aayeNge

Hum apne khoye hue pal shumar karte hue

Guzar na jaye ye tajdeed E ahd ka mausam

Masaalehat ki fiza saazgaar karte hue

ZameeN ko zard libaadaa pasand aata hua

Falak darakhtoN ko be barg o bar karte hue

**********~*~**********

Kab hawaa E sitam se darte thay
Khaahish E rang O boo jo karte thay

Us gali meN kabhi na khaak uRe
Be sabab jis se hum guzarte thay

Uski yaadeN udaas karti thiN
Uski yaadoN se hi saNwarte thay

Ek aisa bhi daur guzraa hai
Log aapas meN pyaar karte thay

Jaane kya mashGhalaa hai ab unka
Zindagi meN jo rang bharte thay

**********~*~**********

Next >horsewalk

Advertisements

9 thoughts on “Ghazals

  1. Bohat achi shairi hay aur ……………joan alia se andaaz milta hay magar joan ki tarha yaas nahi balky faiz ki tarha umeed nazar aati hay . sab shair bohat achay hain magar kuch to bohat aalaa payay kay hain ……….

    Kuchh faisle to honge mere ikhtiyaar ke !!!!
    Aankhon se ye ghelaaf utar jaanaa chahiye
    Jab mere paas us ke liye chhat talak nahi !
    Ae uski aarzoo, tujhe mar jaanaa chaahiye

    zzzzzzzzzzzzzzzzzzzzzz

    Bhale hi chhaaoN na de, aasraa to detaa hai
    Ye aarzu ka shajar hai, khazaaN raseedaa sahi
    Inhi bujhi hui aankhoN me khaab aaye gaa
    YaqiN na chhor, ye bimaar o shab gazeedaa sahi

    Aarzoo, khaab, aas, mahroomee
    Hausla phir bhi hum ne haara kya
    Chaar aansu bahake sab chup hain
    RayegaaN qatl hai hamara kya

  2. please send me this ghazal if any one have this plzzzzzzzzzzzzz
    ghar kya bnaya us ny masjid k samny
    chhahat ke os ny hamy namazi bna dya

  3. ☆☆☆( allma iqbal )☆☆☆

    Ishq matqul se Qateel se humdardi bhi …
    Kis se itaat ki jazha mange ga …
    Sajda KHALIK ko bhi iblees se yarana bhi …
    Hashar me kis se aQeedat ka sila mange ga …

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s