Ghazals1

*********

*********

*********

Tum pe kuchh meri dastars hi nahin
Naa -um- midee meri abas hi nahin.

Hum diwaane ye soch ke khush hain
Rooh ke waaste qafas hi nahin !!

Saa’d ki khaamiyaan bhi haasil hain
Paas mere faqat nahas hi nahin.

Haakim e shahr khubiyun se pur
per wo naadaan khudaa taras hi nahin

Aao aankhen hi rehn rakhwaaden
khaab per jab hamara bas hi nahin

***********************************

Manind e khar o khas gaya main
Sailab ke dil me bas gaya main

Maujood the sab tere ilaawaa
Kis qarya e nahas gaya main

Khaabon ne mujh me zahr ghola
Ab ke unhi ko das gayaa main

Hai band kab se wo dareechaa
Us shakl ko to taras gayaa main

Aaye the wo meri raaye lene
Phir jaanib e qafas gayaa main

*************************************

Baarisehn pattharon ki paiham hain
Ab ye lagne lagaa bure hum hain

Bad dili jab se raah kaat gayi
Hauslon ke chiraagh maddham hain

Ab khushi kiyon na raqs farmaye !
Hum jo mahsur halqa e gham hain !

Shauq e parwaaz oob jaata hai
Wus’aten kaayanaat ki kam hain

Haasil e aashiqui – bichhar jaana
Aisi rasmon se hum to barham hain

Phone per qahqahe bhi hain lekin
Uske alfaaz kis qadar nam hain !

*********************************

Usi ka jaanfezaa paighaam aaya
Musibat me khuda hi kaam aaya

Zara pasti men qismat aazmaalun
Bulandi se to main naakaam aaya

Bahut unchi uranen bharne walaa
Parindaa aaj zer e daam aayaa

Shaheed e ishq me ye dekhnaa to
Hamaare baa’d kiska naam aayaa

Junun pahle se thaa teri gali men
Kherad ko bhi wahin aaraam aayaa

Hamaari baat banne jaa rahi thi !
Tabhi basti men ek gulfaam aayaaa

************************************

Ameeron ki jabin saayi na karte
Anaa ki aisi ruswaayi na karte

Viraasat ki tarah rishte ki daulat
kabhi taqseem ae bhai na karte

Hamaare paas surat hi kahan thi
Jo apne saamne aayina karte

Bahut mahfuz dil rahta agar hum
Hasinon se shanaasaayi na karte

Ye jaan ankhon ke raste bah nikalti
Agar hum khamaafarsaayi na karte

( Published )

*******************************************

Hont ke shigaaf bhar diye gaye
Lafz paayamaal kar diye gaye!!

Uraan ki sazaa koi ghalat na thi
Khahishon ke par katar diye gaye

Fitratan hi zindagi udaas thi!!!
Warna kitne naghmagar diye gaye

Jaan ki amaan de rahe the woh
Hum harees, nazr e sar diye gaye

Titliyaan udaad hain chaman ko jab
Be hunar bahaar gar diye gaye!!

Zindagi ne dukh hi dukh diye magar!!
Hum “bakhair hain” khabar diye gaye

( Published )

*********************************************

Mere husn e bayaaN me shamil thaa
Woh meri daastaaN me shamil thaa

Meri   basti  ko  lootne waalaa!!!!!!!!
Wafd e rahat rasaaN me shamil thaa

Us ki khaatir jahaan haar gaye
Kya maza us zayaaN me shamil thaa

Justajoo maaNd parti jati thi
Dil ajab kaarwaaN me shamil thaa

Gumrahi ka wo bad numa lamhaa
Meri tatheer e jaaN me shamil thaa

(Published)

*****************************************

Phul, khushbu, sahaab hona to
Ae dua mustajaab honaa to

Main gahan tak tujhena lagne dun
Tum mera maahtaab honaa to

Manzilen intezaar men hongi
Hauslo!! ham rekaab honaa to

Waaqif e sard o garm bhi hona
Haami e inqelaab honaa to

Nuqs tujh me bhi sab nikalenge
Ek zara kaamyaab honaa to

Main use dekh kar hi jita hun
Ho gaya us ka khaab hona to

***************************************
Apni aankho se tujh ko pee jaayen
Paas se tere kiya dukhi jaayen!

Dil ki tat_heer ab zaruree hai
Khaahishen sangsaar ki jaayen

Abke apnaa milan hai naa mumkin
Qismaten kaash phir likhi jaayen

Tab anaa ka khyaal – be maa’nee
Jab muraa’aat maang li jaayen

Zindagi ki talab, hamen kab thi
Muft haath aagayi to ji jaayen!

*************************************

Ek sitaaraa sa badan dhyan me hai
Ek dil aawez sadaa kaan me hai

Hijr ki raat me kuchh neend bhi ho
Wasl ka khaab to imkaan me hai

Zindagi tujh se muzaiyyan thi kabhi
Ab to shayad ye bayaabaan me hai

Teri sairaabi – e – jaaN par laa’nat
Jo mere qatl ke aelaan me hai

Tujh ko paaye hue muddat guzri
Phir talab kya dil e naadaan me hai

Gham k maaroN ka pata kaun kare
Shahr tera hai, tere dhyaan me hai

****************************************************

Degaa mere kartoot ka taawaan koi aur
Hai jurm mera, hoga pashemaan koi aur

Ab paas mere kya hai udaasi ke ilawaa
Tu dhundle dar ae dil e naadaan koi aur

Sab jhut hai ke teri muhabbat ka asar hai
Aansoo ki rawaani ka hai unwaan koi aur

Yarab tere aayeen me tarmeem hui hai?
Teri hai magar leta hai ye jaan koi aur!

Hum Sarmad-o-Mansur k pahlu me khare hain
Wo dhundte hain saahab-e-eemaan koi aur

**********************************************

Lag raha tha wo kahin dekha hua tha
Kya mujhe pahchaan ka dhoka hua tha

Az sar -e- nau zindagi tarteeb pati
Us se pahle dil mera murdaa hua tha

Jaan lewaa  thi  hamari  pahredaari
Muhtasib kuchh roz ka jaagaa hua tha

Aaj – un peroN ke saaye yaad aaye!!
Jin ko eendhan k liye kaataa hua tha

Aaj kaise tere lab pe geet aaye??
Kal to chhup k roraha tha kya hua tha

**********************************************

Jaras e gul ki sada yaad kare
Tere lehje ko sabaa yaad kare

Meri is dasht navardi ka sabab
Mera  mahboob zara  yaad kare

Bhir me khud ko bhulade ye dil
Jaane tanhayi me kya yaad kare

Chara gar zakhm chhupayeN mera
KyoN unheN khalqkhuda yaad kare

Aree khoyi hui manzil tujh ko
Door ek aabla – paa yaad kare

**********************************************

Next >horsewalk1


Advertisements

5 thoughts on “Ghazals1

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s