Main Gunahgaar, Aur Anginat Paarsaa …

Main gunahgaar, aur anginat paarsaa, chaar jaanib se yalghar karte hue
Jaise shabkhuun meN baukhlaa kar utheN, log talwaar talwaar karte hue

Phir chhati his ne parche lagaaye bahut, aayine aaqebat ne dikhaaye bahut
Bhaayee ne aaj kyuuN mujh ko dekha nahi, taajposhi ka darbaar karte hue

Yeh zamaanaa  laga hai  k ab jism me,  khaar k waaste khuun baqui nahiN
Ek woh waqt bhi tha k chalte the hum, raaste bhar ko gulnaar karte hue

Ur rahi thi wahaaN gard tashkik ki, aandhiyaaN tez thiN tanz-o-tazhik ki
Raaste meN paRaa  nek – naami  ka pul, khauf aayaa jise paar karte hue

Berukhi ki hawaayeN muwafiq na thiN, kaise ikhlaaq ki koNpaleN phuT_tiN
Chaar aansu zaminoN ko num kargaye, sard lafzoN ko be-kaar karte hue

Woh kharaasheN dikhate rahe haath ki, sang baari k dauraan aayiN thiN jo
Aur idhar zakhm e sar hum chhupaate rahe, khuub tazyeen e dastaar karte hue

Tarz e t’ameer k kuchh naye zaviye, asr-e-nau ko muzaffar ne bakhshe to hain
Apni hi zaat par waar karte hue,  apni hasti ko mismaar karte hue