Month: December 2009

Ye Tabi’at Hai To Khud Aazaar Ban JaayeNge Ham …

by Ghalib Ayaz, posted in Ahmad Faraz, ILHAAMI AAYAAT


Ye tabi’at hai to Khud aazaar ban jaayeNge ham
Charaagar royeNge aur Gam_Khvar ban jaayeNge ham

Ham sar-E-chaak-E-vafa haiN aur tera dast-E-hunar
Jo bana degaa hameN ai yaar ban jaayeNge ham

Kya Khabar thi ai nigaar-E-she’r tere ishq meN
Dil_baraan-E-shahr ke dil_daar ban jaayeNge ham

SaKht jaaN haiN par hamaari ustavaari par na ja
Aise TuuteNge teraa iqaraar ban jaayeNge ham

Aur kuch din baiTne do ku-E-janaaN meN hamen
Rafta rafta saayaa-E-divaar ban jaayeNge ham

Is qadar aasaaN na hogi har kisii se dosti
Ashnayi meN tera me’yaar ban jaayeNge ham

Mir-O-Galib kya K ban paaye nahin Faiz-O-Firaq
Zo’m ye thaa Ruumi-O-‘Ataar ban jaayeNge ham

Dekhne meN shaKh-E-gul lagte haiN lekin dekhna
Dast-E-gulchiN ke liye talvaar ban jaayeNge ham

Ham chiraGhoN ko to tariki se laRana hai ‘Faraz’
Gul hue par subh ke aasaar ban jaayeNge ham

Laayiq E Deed Woh Nazaaraa Tha …

by Ghalib Ayaz, posted in ILHAAMI AAYAAT, Muzaffar Hanfi


Laayiq  E deed woh nazaaraa tha
Laakh naizay thay sar hamaaraa tha


Ek aaNdhi si kyuN badan meN hai
Us nay shayadd hameN pukaaraa tha


Shukriyaa reshmi dilaasay ka
Teer to aap nay bhi maaraa tha


BaadbaaN say ulajh gaya langar
Aur do haath par kinaaraa tha


Sahabo baat dastaras ki thi
Ek jugnoo tha, ek sitaaraa tha


AsmaaN bojh hi kuch aisaa hai
Sar jhukaanaa kisay gawaaraa tha


Ab namak tak nahi hai zakhmoN par
DostoN sai baRa sahaaraa tha



Aaiinaa KyuN Na DuN K Tamaashaa KaheN Jise …

by Ghalib Ayaz, posted in ILHAAMI AAYAAT, Mirza Ghalib


Aaiinaa kyuuN na duuN K tamaashaa kaheN jise
Aisaa kahaaN se laauuN K tujhsaa kaheN jise


Hasrat ne laa rakhaa terii bazm-E-Khayaal meN
Guldastaa-E-nigaah suvedaa kahe.n jise


PhuuNkaa hai kisane gosh E muhabbat meN ai Khudaa
Afasuun-E-intazaar E tamannaa kaheN jise


Sar par hujuum-E-dard-E-Ghariibii se Daliye
Vo ek musht-E-Khaak K seharaa kaheN jise


Hai chashm-E-tar meN hasarat-E-diidaar se nihaaN
Shauq-E-inaaN guseKhtaa dariyaa kaheN jise


Darakaar hai shiguftan-E-gul haaye aish ko
Subh-E-bahaar pa.nbaa-E-miinaa kaheN jise


“Ghalib” buraa na maan jo vaaiz buraa kahe
Aisaa bhii koii hai K sab achchhaa kaheN jise

Ab Bhalaa ChhoR Ke Ghar Kyaa Karte …

by Ghalib Ayaz, posted in ILHAAMI AAYAAT, Parvin Shakir


Ab bhalaa chhoR ke ghar kyaa karte
Shaam ke vaqt safar kyaa karte


Terii masruufiyyateN jaante haiN
Apne aane kii Khabar kyaa karte


Jab sitaare hii nahiiN mil paaye
Le ke ham shams-O-qamar kyaa karte


Vo musaafir hii khulii dhuup kaa thaa
Saaye phailaa ke shajar kyaa karte


Khaak hii avval-O-aaKhir Thahrii
Kar ke zarre ko guhar kyaa karte


Raa’e pahle se banaa lii tuune
Dil meN ab ham tere ghar kyaa karte


Ishq ne saare saliiqe bakhshe
Husn se kasb-E-hunar kyaa karte


Shaamyanay Meri Gheebat MeN Hawa Taan_ti Hai …

by Ghalib Ayaz, posted in ILHAAMI AAYAAT, Muzaffar Hanfi


Shaamyanay meri Gheebat meN hawa taan_ti hai


GaaoN meN meray na hoonay sai baRi shaan_ti hai


Wo bagola hai ke uRnay pe sadaa aamaadaa


MaiN jo mitti huN to mitti bhi kahaaN maan_ti hai


Dekhnaa kaisay humaknay lagay saray pat_thar


Meri wahshat ko tumhari gali pahchaan_ti hai


Phool banti hai kali hansatay haNsaatay lekin


Uskay dil pe jo guzarti hai wohi jaan_ti hai


Meri koshish hai K duniyaa ko banaadooN firdaus


Aur duniya mujhay naakaaroN men gardaan_ti hai


Hum ko ek haal meN qismat nahi rahnay deti


Kabhi mitti men milati hai, kabhi chhaan_ti hai


Na Tera Qurb Na Baadaa Hai Kya Kiya Jaaye …

by Ghalib Ayaz, posted in Ahmad Faraz, ILHAAMI AAYAAT


Na tera qurb  na baadaa hai kya kiya jaaye
phr aaj dukh bhi zyaadaa hai kya kiya jaaye


HamaiN bhi arz-E-tamanna ka Dhub nahi aataa
Mizaaj-E-yaar bhi saadaa hai kya kiya jaaye


Kuch apnay dost bhi tarkash badosh phirtay haiN
Kuch apna dil bhi kushaadaa hai kya kiya jaaye


Voh mehrbaaN hai magar dil ki hirs bhi kum ho
Talb, karam se zyaadaa hai kya kiya jaaye


Na us se trk-E-ta’alluQ ki baat kar paayeN
Na hamdami ka eraadaa hai kya kiya jaaye


Saluk-E-yaar se dil doobney laga hai Faraz
Magar ye mehfi-E-a’adaa hai kya kiya jaaye


Duniya Ne Hum Pe Jab Koi Ilzaam Rakh Diya …

by Ghalib Ayaz, posted in ILHAAMI AAYAAT, Qateel Shifayi

Duniya ne hum pe jab koi ilzaam rakh diya
Humne muqabil uske tera naam rakh diya


Eik khaas had pe aa gayi jab teri berukhi
Naam uska humne gardish-E-ayaam rakh diya


Min larkhara raha huN tujhe dekh dekh kar
Tu nay to mere saamne eik jaam rakh diya


Kitna sitam-zareef hai woh saheb-E-jamaal
Usne diya jala ke lab-E-baam rakh diya


Ab jis ke jee meN aaye wohi paye roshni
Hum ne to dil jala ke sar-E-‘aam rakh diya


Kya maslehat-shanaas tha woh admi ‘Qateel’
MajbooriyoN ka jisne ‘wafa’ naam rakh diya


Raat Ke Khaab SunaayeN Kis Ko …

by Ghalib Ayaz, posted in Ibn e Insha, ILHAAMI AAYAAT


Raat ke Khaab sunaayeN kis ko raat ke Khaab suhaane the
DhuNdhle dhuNdhle chehre the par sab jaane pahchaane the


Ziddii vahshii alhaR chanchal miiThe log rasiile log
HoNT un ke GhazaloN ke misr’e aaNkhoN meN afsaane the


Ye laRkii to in galiyoN meN roz hii ghuumaa kartii thii
Is se un ko milnaa thaa to is ke laakh bahaane the


Ham ko saarii raat jagaayaa jalte bujhte taaroN ne
Ham kyuuN un ke dar pe utre kitne aur Thikaane the


Vahshat kii unvaan hamaarii in meN se jo naar banii
DekheNge to log kaheNge ‘Insha’ ji diiivaane the